இலங்கை நிர்வாக சேவை III தரத்திற்கு 40 பேர் ஆட்சேர்ப்பு 2026

இலங்கை நிர்வாக சேவையின் III தரத்தில் நிலவும் 40 வெற்றிடங்களை மட்டுப்படுத்தப்பட்ட அடிப்படையில் நிரப்புவதற்காக 2026 ஆம் ஆண்டிற்கான மட்டுப்படுத்தப்பட்ட போட்டிப் பரீட்சை நடத்தப்படவுள்ளது.

அரச நிர்வாக, மாகாண சபைகள் மற்றும் உள்ளூராட்சி அமைச்சினால் வெளியிடப்பட்டுள்ள இந்த வர்த்தமானி அறிவித்தலின் அடிப்படையில், தேவையான தகைமைகளை பூர்த்தி செய்துள்ள இலங்கைப் பிரஜைகளிடமிருந்து விண்ணப்பங்கள் கோரப்பட்டுள்ளன.

விண்ணப்பிக்கும் காலம்

இந்தப் பரீட்சைக்கான விண்ணப்பங்களை இணையவழி முறையில் மட்டுமே சமர்ப்பிக்க முடியும்.

விண்ணப்பங்கள் 2026 ஆகஸ்ட் 31 ஆம் திகதி காலை 9.00 மணிக்கு திறக்கப்பட்டு 2026 செப்டம்பர் 30 ஆம் திகதி இரவு 9.00 மணிக்கு நிறைவடையும்.

விண்ணப்பதாரர்கள் இலங்கை பரீட்சைகள் திணைக்களத்தின் www.doenets.lk இணையத்தளத்திற்குச் சென்று Our Services பகுதியில் உள்ள Online Applications Recruitment Exams E B Exams பிரிவின் ஊடாக விண்ணப்பிக்க வேண்டும்.

பரீட்சை நடைபெறும் காலம் மற்றும் இடம்

பரீட்சை 2026 டிசம்பர் மாதத்தில் கொழும்பு மாவட்டத்தில் நடத்தப்படும். பரீட்சையை நடத்துவது தொடர்பான தீர்மானங்கள் அரச சேவை ஆணைக்குழுவின் விதிமுறைகளுக்கு அமைவாக பரீட்சைகள் ஆணையாளர் நாயகத்தினால் மேற்கொள்ளப்படும்.

பதவி

இந்தப் போட்டிப் பரீட்சையின் மூலம் இலங்கை நிர்வாக சேவையின் III தரத்திற்கு ஆட்சேர்ப்பு செய்யப்படவுள்ளது.

எழுத்துப் பரீட்சை

எழுத்துப் பரீட்சை நான்கு வினாத்தாள்களைக் கொண்டதாக இருக்கும். ஒவ்வொரு வினாத்தாளுக்கும் 100 மதிப்பெண்கள் வழங்கப்படும். ஒவ்வொரு பாடத்திலும் குறைந்தபட்சம் 50 மதிப்பெண்கள் பெற்றால் மட்டுமே தேர்ச்சி பெற முடியும்.

முதலாவது பாடம் பொது அறிவுத்திறன்

எண்ணியல், மொழியியல் மற்றும் உருவ அமைப்புகள், அவற்றுக்கிடையிலான தொடர்புகள் போன்றவற்றை அடிப்படையாகக் கொண்ட பிரச்சினைகளை பகுப்பாய்வு செய்யும் திறன், தர்க்க ரீதியான புரிதல், விளக்கமளிக்கும் திறன், சூழ்நிலைகளுக்கு அறிவைப் பயன்படுத்தும் திறன் மற்றும் முடிவுகளுக்கு வரும் திறன் ஆகியவை பரிசோதிக்கப்படும்.

காலம் 1 மணி 30 நிமிடங்கள். மொத்த மதிப்பெண் 100. குறைந்தபட்ச தேர்ச்சி மதிப்பெண் 50. இந்த வினாத்தாள் பல்தேர்வு வினாக்களைக் கொண்டிருக்கும்.

இரண்டாவது பாடம் இலங்கையின் சமூக பொருளாதார அரசியல் பின்னணி மற்றும் உலகளாவிய போக்குகள்

இலங்கை மற்றும் உலகின் சமூக, பொருளாதார, அரசியல், கலாசார, விஞ்ஞான மற்றும் தொழில்நுட்ப நிலைமைகள் தொடர்பான அறிவு பரிசோதிக்கப்படும்.

மேலும் வழங்கப்படும் சூழ்நிலைகளை அடிப்படையாகக் கொண்டு ஆக்கபூர்வமாகவும் பகுப்பாய்வு ரீதியாகவும் விமர்சன ரீதியாகவும் சிந்திக்கும் திறன், முன்னுரிமைகளை தீர்மானிக்கும் திறன் மற்றும் எதிர்காலத்தை திட்டமிடும் திறன் ஆகியவையும் மதிப்பிடப்படும்.

காலம் 3 மணி நேரம். மொத்த மதிப்பெண் 100. குறைந்தபட்ச தேர்ச்சி மதிப்பெண் 50. பல்தேர்வு வினாக்கள், குறுகிய வினாக்கள், கட்டமைக்கப்பட்ட கட்டுரை வினாக்கள் மற்றும் கட்டுரை வினாக்கள் இடம்பெறும்.

மூன்றாவது பாடம் அரச நிர்வாகம் தொடர்பான பாடம் ஒன்று

இந்தப் பாடத்தில் நிறுவன விதிக்கோவை, அரச சேவை ஆணைக்குழுவின் நடைமுறை விதிகள் மற்றும் நிதி விதிமுறைகள் தொடர்பான அரச சேவை நடைமுறைகள் பரிசோதிக்கப்படும்.

அரச சேவையின் பல்வேறு சூழ்நிலைகளில் ஏற்படக்கூடிய பிரச்சினைகளை அடிப்படையாகக் கொண்ட நிகழ்வுகள் வழங்கப்பட்டு அவற்றை நிறுவன விதிக்கோவை மற்றும் நிதி விதிமுறைகளுக்கு அமைவாக கையாளும் ஆக்கபூர்வ சிந்தனை மற்றும் பிரச்சினை தீர்க்கும் திறன் மதிப்பிடப்படும்.

காலம் 3 மணி நேரம். மொத்த மதிப்பெண் 100. குறைந்தபட்ச தேர்ச்சி மதிப்பெண் 50.

நான்காவது பாடம் அரச நிர்வாகம் தொடர்பான பாடம் இரண்டு

இந்தப் பாடம் ஆக்கபூர்வ, பகுப்பாய்வு மற்றும் தொடர்பாடல் திறன்களை மதிப்பிடும் வகையில் அமைந்திருக்கும்.

கொடுக்கப்படும் தலைப்புகள் மற்றும் கருப்பொருள்களில் இருந்து தேர்ந்தெடுக்கப்பட்ட விடயங்களை அடிப்படையாகக் கொண்டு கருத்துகள் மற்றும் தகவல்களை பகுப்பாய்வு செய்தல், ஒழுங்குபடுத்துதல் மற்றும் முன்வைத்தல் தொடர்பான திறன்கள் மதிப்பிடப்படும்.

மேலும் சிக்கலான ஒரு பந்தி, ஆவணம் அல்லது செய்தியைப் புரிந்துகொண்டு அதிலுள்ள பிரதான கருத்துகளை தமது சொந்த வார்த்தைகளில் தெளிவாகவும் சரியாகவும் சுருக்கமாக வெளிப்படுத்தும் திறனும் பரிசோதிக்கப்படும்.

காலம் 3 மணி நேரம். மொத்த மதிப்பெண் 100. குறைந்தபட்ச தேர்ச்சி மதிப்பெண் 50.

எழுத்துப் பரீட்சை மதிப்பெண்கள்

விண்ணப்பதாரர்கள் நான்கு வினாத்தாள்களிலும் கட்டாயம் தோற்ற வேண்டும்.

விண்ணப்பதாரர்களுக்கான கல்வித் தகைமைகள்

விண்ணப்பதாரர் இலங்கை அல்லது வெளிநாட்டில் பல்கலைக்கழக மானியங்கள் ஆணைக்குழுவினால் அங்கீகரிக்கப்பட்ட பல்கலைக்கழகத்தினால் வழங்கப்பட்ட பட்டம் பெற்றிருக்க வேண்டும்.

அல்லது இலங்கை பாராளுமன்ற சட்டத்தின் மூலம் நிறுவப்பட்ட பல்கலைக்கழகமொன்றினால் வழங்கப்பட்ட பட்டம் பெற்றிருக்க வேண்டும்.

அல்லது 1978 ஆம் ஆண்டின் 16 ஆம் இலக்க பல்கலைக்கழகச் சட்டத்தின் 25A பிரிவின் கீழ் அங்கீகரிக்கப்பட்ட பட்டம் பெற்றிருக்க வேண்டும்.

சேவை அனுபவம்

பட்டம் பெற்றுள்ளதுடன் அரச சேவை அல்லது மாகாண அரச சேவையில் நிரந்தரமான ஓய்வூதிய உரிமையுள்ள பதவியில் குறைந்தது 5 வருட செயலில் உள்ள திருப்திகரமான சேவையை நிறைவு செய்திருக்க வேண்டும்.

தொடர்புடைய சேவை MN 2 2025 அல்லது அதற்கு மேற்பட்ட MN சம்பளக் குறியீட்டின் கீழ் அல்லது SL 1 2025 சம்பளக் குறியீட்டின் கீழ் சம்பளம் பெறும் பதவியாக இருக்க வேண்டும்.

மற்றொரு தகைமை வழியாக மேற்கண்ட வகையான அரச அல்லது மாகாண அரச சேவையில் குறைந்தது 10 வருட செயலில் உள்ள திருப்திகரமான சேவையை நிறைவு செய்த அதிகாரிகளும் விண்ணப்பிக்க முடியும்.

அரச சேவை மற்றும் மாகாண அரச சேவைகளில் தொடர்புடைய தொடர்ச்சியான சேவைக் காலங்கள் ஒன்றாகக் கணக்கிடப்படும்.

வயது வரம்பு

தகைமைகள் பூர்த்தி செய்யப்படும் நாளன்று விண்ணப்பதாரரின் வயது 53 ஐ தாண்டியிருக்கக்கூடாது.

இதன்படி 1973 ஆகஸ்ட் 28 ஆம் திகதி அல்லது அதற்குப் பின்னர் பிறந்தவர்கள் இந்தப் பரீட்சைக்கு விண்ணப்பிக்க தகுதியுடையவர்கள்.

சேவையில் நிரந்தரப்படுத்தல்

விண்ணப்பதாரர் சம்பந்தப்பட்ட சேவை அல்லது பதவியில் நிரந்தரப்படுத்தப்பட்டிருக்க வேண்டும்.

எனினும் நிரந்தரப்படுத்தலுக்கான கடிதம் இன்னும் வழங்கப்படாத நிலையில், பரீட்சைக்கு தேவையான அனைத்து தகைமைகளையும் பூர்த்தி செய்துள்ள மற்றும் சேவையில் நிரந்தரப்படுத்தப்படுவதற்கான அனைத்து நிபந்தனைகளையும் பூர்த்தி செய்துள்ள அதிகாரிகளும் விண்ணப்பிக்க முடியும்.

அவ்வாறான அதிகாரிகள் தகைமை பரிசோதிக்கப்படும் நாளுக்குள் நிரந்தரப்படுத்தலுக்கான திறன் பரீட்சையில் சித்தியடைந்திருக்க வேண்டும்.

அவர்கள் எழுத்துப் பரீட்சையில் சித்தியடைந்து பொது நேர்முகப் பரீட்சைக்கு தகுதி பெற்றால், நேர்முகப் பரீட்சைக்கு வரும்போது நிரந்தரப்படுத்தல் கடிதத்தை கட்டாயம் சமர்ப்பிக்க வேண்டும்.

ஒழுக்காற்றுத் தகைமை

தகைமைகள் பூர்த்தி செய்யப்படும் நாளன்று அரச சேவை ஆணைக்குழுவின் 01 2020 ஆம் இலக்க சுற்றறிக்கையின் ஏற்பாடுகளுக்கு முரணான ஒழுக்காற்றுத் தண்டனை எதுவும் பெற்றிருக்கக்கூடாது.

பரீட்சைக்கு தோற்றக்கூடிய தடவைகள்

இந்த மட்டுப்படுத்தப்பட்ட போட்டிப் பரீட்சைக்கு ஒருவர் அதிகபட்சம் மூன்று தடவைகள் மட்டுமே தோற்ற முடியும்.

முந்தைய சேவை விதிமுறைகளின் கீழ் இலங்கை நிர்வாக சேவையின் III தரத்திற்கு ஆட்சேர்ப்பு செய்வதற்கான பரீட்சைகளில் தோற்றிய தடவைகள் இந்தக் கணக்கில் சேர்க்கப்படாது.

பரீட்சைக் கட்டணம்

பரீட்சைக் கட்டணம் 1200 ரூபாய் ஆகும்.

கட்டணத்தை எந்தவொரு வங்கியின் கடன் அட்டை மூலமாகவும், இணையவழி பணப்பரிமாற்ற வசதியுள்ள வங்கி பற்று அட்டை மூலமாகவும், இலங்கை வங்கியின் Online Banking அல்லது Flex App மூலமாகவும் அல்லது இலங்கை வங்கியின் Teller Slip Payment மூலமாகவும் செலுத்த முடியும்.

முழுமையான 1200 ரூபாய் கட்டணத்தையும் செலுத்த வேண்டும். குறைவாகவோ அதிகமாகவோ கட்டணம் செலுத்தப்பட்ட விண்ணப்பங்கள் நிராகரிக்கப்படும்.

Online விண்ணப்பம் தொடர்பான முக்கிய விடயங்கள்

Online விண்ணப்பம் ஆங்கில மொழியில் மட்டுமே பூர்த்தி செய்யப்பட வேண்டும்.

விண்ணப்பத்தை பூர்த்தி செய்வதற்கு முன்னர் பரீட்சைக்கான Instructions ஆவணத்தை பதிவிறக்கம் செய்து அதில் குறிப்பிடப்பட்டுள்ள அனைத்து வழிமுறைகளையும் கவனமாகப் பின்பற்ற வேண்டும்.

Online விண்ணப்பத்தை சமர்ப்பித்த பின்னர் விண்ணப்பம் ஏற்றுக்கொள்ளப்பட்டதா அல்லது ஏற்றுக்கொள்ளப்படவில்லையா என்பது விண்ணப்பத்தில் பயன்படுத்தப்பட்ட கையடக்கத் தொலைபேசி இலக்கம் அல்லது மின்னஞ்சல் முகவரி மூலம் அறிவிக்கப்படும்.

விண்ணப்பத்தின் அச்சுப் பிரதியை பெற்ற பின்னர் அதில் மேற்கொள்ளப்படும் மாற்றங்கள் செல்லுபடியாகும் திருத்தங்களாக ஏற்றுக்கொள்ளப்படமாட்டாது.

முழுமையற்ற விண்ணப்பங்களும் இறுதி நாளுக்குப் பின்னர் கிடைக்கும் விண்ணப்பங்களும் அறிவிப்பு இன்றி நிராகரிக்கப்படலாம்.

பரீட்சை அனுமதிப்பத்திரம்

தகைமைகளை பூர்த்தி செய்து உரிய கட்டணத்தை செலுத்திய விண்ணப்பதாரர்களுக்கு பரீட்சை அனுமதிப்பத்திரம் Online மூலமாக மட்டுமே வழங்கப்படும்.

அனுமதிப்பத்திரம் வழங்கப்பட்டவுடன் பரீட்சைகள் திணைக்களம் இணையத்தள அறிவிப்பின் மூலமும் SMS மூலமும் விண்ணப்பதாரர்களுக்கு அறிவிக்கும்.

அனுமதிப்பத்திரம் கிடைக்காதவர்கள் பரீட்சைகள் திணைக்களத்தின் நிறுவனப் பரீட்சை ஏற்பாட்டுப் பிரிவை தொடர்புகொள்ள வேண்டும்.

அவ்வாறு தொடர்புகொள்ளும்போது பரீட்சையின் பெயர், விண்ணப்பதாரரின் முழுப் பெயர், தேசிய அடையாள அட்டை இலக்கம் மற்றும் முகவரி ஆகியவற்றை குறிப்பிட வேண்டும்.

பூர்த்தி செய்யப்பட்ட விண்ணப்பத்தின் நகல் மற்றும் பரீட்சைக் கட்டணம் செலுத்திய பற்றுச்சீட்டின் நகலை பாதுகாப்பாக வைத்திருப்பது பயனுள்ளதாக இருக்கும்.

பரீட்சை மொழி

பரீட்சை சிங்களம், தமிழ் மற்றும் ஆங்கிலம் ஆகிய மூன்று மொழிகளிலும் நடத்தப்படும்.

விண்ணப்பதாரர் பரீட்சைக்கு தெரிவு செய்யும் மொழியே நியமனத்திற்கான மொழியாகவும் கருதப்படும்.

அனைத்து வினாத்தாள்களுக்கும் ஒரே மொழியிலேயே விடையளிக்க வேண்டும். விண்ணப்பத்தில் தெரிவு செய்யப்பட்ட பரீட்சை மொழியை பின்னர் மாற்றுவதற்கு அனுமதி இல்லை.

நேர்முகப் பரீட்சை

நேர்முகப் பரீட்சை பொது நேர்முகப் பரீட்சை மற்றும் கட்டமைக்கப்பட்ட நேர்முகப் பரீட்சை என இரண்டு பகுதிகளைக் கொண்டிருக்கும்.

பொது நேர்முகப் பரீட்சை

விண்ணப்பதாரர் ஆட்சேர்ப்புக்கான அனைத்து தகைமைகளையும் பூர்த்தி செய்துள்ளாரா என்பதையும் தகைமை தொடர்பான கட்டுப்பாடுகளுக்கு இணங்குகிறாரா என்பதையும் பரிசோதிப்பதற்காக பொது நேர்முகப் பரீட்சை நடத்தப்படும்.

இந்த நேர்முகப் பரீட்சைக்கான குழு அரச சேவை ஆணைக்குழுவினால் நியமிக்கப்படும்.

பொது நேர்முகப் பரீட்சையில் மதிப்பெண்கள் வழங்கப்படமாட்டாது.

கட்டமைக்கப்பட்ட நேர்முகப் பரீட்சை

கட்டமைக்கப்பட்ட நேர்முகப் பரீட்சையில் விண்ணப்பதாரரின் முகாமைத்துவ திறன்கள், தலைமைத்துவ பண்புகள், தொடர்பாடல் திறன்கள் மற்றும் ஆளுமை ஆகியவை மதிப்பிடப்படும்.

ஒவ்வொரு மதிப்பீட்டுப் பிரிவிலும் குறைந்தது 50 சதவீதம் அல்லது அதற்கு மேற்பட்ட மதிப்பெண்களைப் பெற்றிருக்க வேண்டும்.

இறுதி தெரிவு

எழுத்துப் பரீட்சையில் அனைத்து பாடங்களிலும் தேவையான குறைந்தபட்ச மதிப்பெண்களைப் பெற்று, மொத்தமாக அதிக மதிப்பெண்களைப் பெற்ற விண்ணப்பதாரர்கள் பொது நேர்முகப் பரீட்சைக்கு அழைக்கப்படுவர்.

பொது நேர்முகப் பரீட்சைக்கு அழைக்கப்படும் எண்ணிக்கை எதிர்பார்க்கப்படும் வெற்றிடங்களின் எண்ணிக்கை மற்றும் அந்த வெற்றிடங்களின் 25 சதவீதம் ஆகியவற்றின் கூட்டுத்தொகையாக இருக்கும்.

தற்போது அறிவிக்கப்பட்டுள்ள வெற்றிடங்கள் 40 என்பதால், 40 வெற்றிடங்களுடன் அதன் 25 சதவீதமான 10 பேரை சேர்த்து மொத்தம் 50 பேர் வரை பொது நேர்முகப் பரீட்சைக்கு அழைக்கப்படலாம்.

எனினும் தகுதி பெற்ற விண்ணப்பதாரர்களின் எண்ணிக்கை இதைவிட குறைவாக இருந்தால், தகுதி பெற்ற விண்ணப்பதாரர்கள் மட்டுமே அழைக்கப்படுவர்.

பொது நேர்முகப் பரீட்சையில் ஆட்சேர்ப்புக்கான அனைத்து தகைமைகளும் பூர்த்தி செய்யப்பட்டிருப்பது உறுதி செய்யப்பட்டவர்களே கட்டமைக்கப்பட்ட நேர்முகப் பரீட்சைக்கு அழைக்கப்படுவர்.

இறுதியாக எழுத்துப் பரீட்சையில் பெற்ற மதிப்பெண்கள் மற்றும் கட்டமைக்கப்பட்ட நேர்முகப் பரீட்சையில் பெற்ற மதிப்பெண்கள் ஆகியவற்றின் மொத்த அடிப்படையில் அதிக மதிப்பெண் பெற்றவர்கள் திறமை வரிசைப்படி இலங்கை நிர்வாக சேவையின் III தரத்திற்கு ஆட்சேர்ப்பு செய்யப்படுவர்.

சம்பள அளவு

2025 மார்ச் 25 ஆம் திகதி வெளியிடப்பட்ட அரச நிர்வாக சுற்றறிக்கை 10 2025 இன் ஏற்பாடுகளுக்கு அமைவாக இந்தப் பதவிக்கான மாதாந்த சம்பள அளவு 82150 ரூபாய் முதல் 195970 ரூபாய் வரை அமைந்துள்ளது.

சம்பளக் குறியீடு SL 1 2025 ஆகும்.

இதற்கு மேலதிகமாக அரசாங்கத்தினால் அவ்வப்போது அரச ஊழியர்களுக்கு வழங்கப்படும் ஏனைய கொடுப்பனவுகளும் கிடைக்கும்.

பதவியின் தன்மை

இந்தப் பதவி நிரந்தரமானதும் ஓய்வூதிய உரிமையுடையதுமாகும்.

நியமனம் ஒரு வருட பரீட்சனைக் காலத்திற்கு உட்பட்டதாக இருக்கும்.

இலங்கை நிர்வாக சேவையின் III தரத்திற்கு நியமிக்கப்பட்டு மூன்று வருடங்களுக்குள் சேவைப்பிரமாணக் கோவையில் குறிப்பிடப்பட்டுள்ள முதலாவது திறன் தடைப் பரீட்சையில் சித்தியடைய வேண்டும்.

மேலும் பதவியில் இணைந்து மூன்று வருடங்கள் நிறைவடைவதற்கு முன்னர் அரச மொழித் திறமையைப் பெற்றிருக்க வேண்டும்.

கடமையை ஏற்றுக்கொள்வது

தமக்கு வழங்கப்பட்ட பதவியின் கடமைகளை உரிய தேதியில் ஏற்கத் தவறுபவர்கள் அல்லது நியமிக்கப்பட்ட பதவி அல்லது பிரதேசத்தில் கடமையை ஏற்க மறுப்பவர்களின் நியமனத்தை இரத்துச் செய்ய அரச சேவை ஆணைக்குழுவின் உத்தரவின்படி நடவடிக்கை எடுக்க முடியும்.

அடையாளத்தை உறுதிப்படுத்துதல்

ஒவ்வொரு வினாத்தாளுக்கும் பரீட்சை மண்டபத்தில் விண்ணப்பதாரர் தனது அடையாளத்தை உறுதிப்படுத்த வேண்டும்.

இதற்காக தேசிய அடையாள அட்டை, செல்லுபடியாகும் கடவுச்சீட்டு அல்லது செல்லுபடியாகும் இலங்கை சாரதி அனுமதிப்பத்திரம் ஆகியவற்றில் ஒன்றை பயன்படுத்தலாம்.

பரீட்சை மண்டபத்திற்குள் நுழையும் போது முகம் மற்றும் இரு காதுகளும் மறைக்கப்படாமல் இருக்க வேண்டும். அடையாளத்தை உறுதிப்படுத்த மறுக்கும் நபர் பரீட்சை மண்டபத்திற்குள் அனுமதிக்கப்படமாட்டார்.

தவறான தகவல்கள் வழங்கினால்

விண்ணப்பதாரர் தகுதியற்றவர் என்பது பின்னர் தெரியவந்தால், பரீட்சைக்கு முன்னர், பரீட்சை நடைபெறும் காலத்தில் அல்லது பரீட்சைக்குப் பின்னர் எந்த நேரத்திலும் அவரது விண்ணப்பதாரர் நிலை இரத்துச் செய்யப்படலாம்.

தெரிந்தே தவறான தகவல்களை வழங்கியிருந்தாலோ அல்லது முக்கியமான தகவலை வேண்டுமென்றே மறைத்திருந்தாலோ அவர் அரச சேவையிலிருந்து நீக்கப்படுவதற்கும் வாய்ப்பு உள்ளது.

முக்கிய சுருக்கம்

இந்த ஆட்சேர்ப்பு பொதுமக்கள் அனைவருக்கும் திறந்த சாதாரண ஆட்சேர்ப்பு அல்ல. ஏற்கனவே குறிப்பிட்ட அரச அல்லது மாகாண அரச சேவையில் தேவையான சேவை அனுபவம் மற்றும் கல்வித் தகைமைகளை பெற்றுள்ள அதிகாரிகளுக்கான மட்டுப்படுத்தப்பட்ட போட்டிப் பரீட்சையாகும்.

அதிகாரப்பூர்வ விண்ணப்ப இணையத்தளம்

இலங்கை பரீட்சைகள் திணைக்களத்தின் அதிகாரப்பூர்வ இணையத்தளமான www.doenets.lk மூலம் Online விண்ணப்பங்களை சமர்ப்பிக்க வேண்டும்.

வர்த்தமாணி - சிங்களத்தில்