அரிசி விலை கட்டுப்பாட்டை மீறியவர்கள் மீது ரூ. 5 லட்சம் வரை அபராதம்

நுகர்வோர் விவகார அதிகாரசபை இதுவரை அரிசி தொடர்பாக 2,000க்கும் மேற்பட்ட சுற்றிவளைப்புகளை மேற்கொண்டுள்ளதாக, அதிகாரசபையின் தலைவர் தெரிவித்துள்ளார். அதிக விலைக்கு அரிசி விற்பனை செய்பவர்களைக் கண்டறியும் நோக்கில், வார இறுதி நாட்களிலும், இரவு நேரங்களிலும் சுற்றிவளைப்புகள் மேற்கொள்ளப்படுவதாக நுகர்வோர் விவகார அதிகாரசபையின் தலைவர் ஹேமந்த சமரக்கோன் தெரிவித்தார்.

இதன் அடிப்படையில், நுகர்வோர் விவகார அதிகாரசபை அதிகாரிகள் இன்று (08) கொழும்பின் புறக்கோட்டைப் பகுதியில் பல சோதனைகளை மேற்கொண்டனர். மேலும், அதிக விலைக்கு அரிசி விற்பனை செய்யும் வணிகர்களை சட்டத்தின் முன் நிறுத்துவதற்காக பல சிறப்பு நடவடிக்கைகளையும் எடுத்துள்ளனர்.

இந்த நடவடிக்கைகளின் போது, மொத்த அரிசி விற்பனைக் கடைகள் நுகர்வோர் அதிகாரிகளின் உளவாளிகளால் சோதனை செய்யப்பட்டன. அதிக விலைக்கு அரிசி விற்பனை செய்யும் கடைகளின் உரிமையாளர்கள் மீது சட்டத்தை கடுமையாக அமல்படுத்துவதற்கான நடவடிக்கைகளும் மேற்கொள்ளப்பட்டன.

கட்டுப்பாட்டு விலையை மீறுதல் மற்றும் விலையை காட்சிப்படுத்தாதது தொடர்பாக வழக்குகளைத் தாக்கல் செய்ய அதிகாரசபை நடவடிக்கை எடுத்துள்ளது. அதிக விலைக்கு அரிசி விற்பனை செய்ததாக நீதிமன்றில் குற்றவாளியாக நிரூபிக்கப்பட்டால், ஒரு தனிப்பட்ட வணிகத்திற்கு ரூ. 100,000 முதல் ரூ. 500,000 வரையிலும், ஒரு நிறுவனத்திற்கு ரூ. 500,000 முதல் ரூ. 50 லட்சம் வரையிலும் அபராதம் விதிக்கப்படலாம் என்று நுகர்வோர் விவகார அதிகாரசபை தெரிவித்துள்ளது.